Екипите на Пари Сен Жермен и Бенфика се стекнаа со минимална предност по првите средби од осминафиналната фаза во фудбалската Лига на шампиони.
На натпреварот во Париз, францускиот првак ПСЖ оствари победа над Челзи со 2:1. Головите за домашниот тим ги постигнаа, Златан Ибрахимовиќ (39.минута) и Едисон Кавани, (78), додека погодокот за англиската екипа го постигна Џон Оби Микел (45+1).
На вториот синоќешен натпревар, во Лисабон, Бразилецот Жонас со гол во судиското продолжение (90+1) и донесе минимална предност на Бенфика од 1:0 против Зенит.
Два натпревара од осминафиналето на елитното натпреварување се играат и вечерва. Двојките се:
Гент – Волфсбург и
Рома – Реал Мадрид.
Натпреварите ќе започнат во стандардниот термин од 20 часот и 45 минути.
Другите парови од оваа фаза се:
Арсенал – Барселона, Јувентус – Баерн Минхен (23 февруари),
ПСВ – Атлетико Мадрид и Динамо Киев – Манчестер Сити (24 февруари).