Во вештачкото езеро Козјак денеска првпат се пливаше маратон од 10 километри во рамки на првата манифестација „Македонски куп во далечинско пливање-Козјак маратон 2013“, што го организираа ЈП „Јасен“ и Пливачката федерација на Македонија.
Учествуваа 52 натпреварувачи во три дисциплини – на 2,5, пет и на 10 километри, а целта беше брегот кај село Близанско. Маратонот од десет километри е и можност за да се достигне олимписката норма и да се учествува на ЛОИ во Бразил идната година.
Маратонот на акумулацијата го отвори министерката за внатрешни работи Гордана Јанкулоска, која искажа задоволство што има ентузијасти кои и на езерото Козјак воведуваат спортска манифестација и очекува таа да стане традиционална.
– Ова може да се смета и како мал придонес во одбележувањето на Денот на независноста, кој оваа година се прославува во духот на спортот, рече Јанкулоска.
Победниците од трките за пливачи ќе добијат пехари, одличја и парични награди во вкупна вредност од 300.000 денари.