Капитенот на Манчестер Сити, Винсент Компани исто како и неговите соиграчи упати низа пофалби за Серхио Агуеро кој беше најзаслужен за синоќешната победа на англискиот првак против Баерн Минхен.
– Ако сакате да успеете, тогаш мора да имате еден посебен играч кој е во посебна форма. Ако немате таков, тогаш нема да успеете. Ни за среќа го имаме Агуеро. Тој е нашиот „Специјален“ и кога е во форма, се е можно и достижно за нас, рече капитенот на „граѓаните“.
Серхио Агуеро во победата на Сити над Баерн со 3:2 ги постигна трите гола за домашната екипа, од кои два во финишот од средбата и со тоа го остави својот тим во игра за освојување на второто место во групата кое обезбедува пласман во следната фаза од Лигата на шампионите.