Фудбалската репрезентација на Иран, со одобрение на ФИФА, ќе го премести својот камп за Светското првенство 2026 од САД во Мексико, изјави вчера претседателот на Иранската фудбалска асоцијација.
ФИФА сè уште не го потврди преместувањето на кампот на репрезентацијата, што го најави Мехди Таџ.
„Сите бази на националните тимови што учествуваат на Светското првенство мора да бидат одобрени од ФИФА“, рече Таџ во соопштението за медиумите.
„За среќа, по нашите барања и состаноци во Истанбул со претставници на ФИФА и Светското првенство, како и вчерашниот вебинар во Техеран со генералниот секретар на ФИФА, нашето барање за промена на кампот на репрезентацијата од САД во Мексико беше одобрено“, додаде тој.
Затоа, иранската репрезентација ќе биде сместена во Тихуана, Мексико, наместо во Тусон во американската сојузна држава Аризона.
„Ќе бидеме сместени во камп во Тихуана, кој се наоѓа во близина на Тихиот Океан и на границата меѓу Мексико и САД“, рече Таџ, додавајќи дека тоа би можело да помогне во решавањето на евентуалните проблеми со визите кога тимот ќе влезе во САД.
Иранските власти претходно овој месец изјавија дека играчите и членовите на персоналот сè уште не добиле визи за САД.
Светското првенство во фудбал ќе се одржи од 11 јуни до 19 јули во САД, Канада и Мексико.
Иран ќе ги игра првите два натпревари во Лос Анџелес против Нов Зеланд и Белгија, а третиот во Сиетл против Египет.