Златан Ибрахимовиќ е топ тема во француските спортски медиуми кои денеска информираат за негова изразена желба да прејде од ПСЖ во Реал Мадрид, а една од причините е освета кон големиот ривал Барселона од која Швеѓанецот беше избркан во 2011 година.
– Ибрахимовиќ има голема желба да го напушти Пари Сен-Жермен и да потпише за Реал Мадрид. Тој дури се согласил за „Кралскиот клуб“ да заигра и за помала плата од сегашната, изјавил неименуван извор од францускиот шампион.
Шпекулациите велат дека Реал би се согласил да исплати на парижаните сума од 20 милиони евра за откупната клаузула на шведскиот напаѓач.
Во новата сезона Реал ќе се обиде да ја симне Барселона од тронот, а ќе биде предводен од тренерот Карло Анчелоти кој минатата сезона го водеше сегашниот клуб на Ибрахимовиќ.
Анчелоти неколку пати токму Ибрахимовиќ го посочуваше како еден од најзаслужните за последните успеси на ПСЖ.