Управниот одбор на Фудбалската федерација на Македонија (ФФМ) ја разгледа и констатираше оставката на членот на Управниот одбор Серафим Димовски за кој е наведено дека заедно со поранешниот селектор Мирсад Јонуз влијаеле Горан Пандев да не игра за репрезентацијата.
– Оставката на Серафим Димовски не е поднесена по лично барање, туку по барање на претседателот на ФФМ поради неспортско, неетички и однесување спротивно на интересите на репрезентацијата и федерацијата, соопштуваат од куќата на фудбалот.
При тоа се додава дека Управниот одбор на ФФМ заклучи дека Серафим Димовски заедно со поранешниот селектор на А репрезентацијата, Мирсад Јонуз работеле спротивно на интересите на македонскиот фудбал и се обидувале да влијаат на нашиот репрезентативец Горан Пандев, барајќи од него да не настапува за А репрезентацијата на Македонија.
– Сето тоа е спротивно на основниот приоритет во работата на Федерацијата, во А репрезентацијата да бидат вклучени најдобрите македонски фудбалери, односно играчите кои ќе ги одбере селекторот на репрезентацијата, а истовремено да се препознаваат и младите таленти, од земјава и од странство, а кои имаат македонски корени и на нив да се гради нашата фудбалска иднина, стои во информацијата од ФФМ.
Од таму порачуваат дека и во иднина за секого кој нема да работи во интерес на македонскиот фудбал, нема да има место во Фудбалската федерација.