Пет клубови од првата македонска фудбалска лига и два второлигаши се под истрага за местење на натпревари.
Полицијата влезе во Фудбалската федерација каде се проверува документацијата и се прибираат информации за клубови, натпревари и официјални лица со сомневање за местење на натпревари.
Од Фудбалската федерација на Македонија се огласија и истакнаа дека елосно соработуваат со органите.
-Министерството за внатрешни работи (МВР) побара информации од Фудбалската федерација на Македонија (ФФМ) кои првенствено се однесуваат на акти кои го регулираат натпреварувањето, записници од официјални натпревари во рамки на натпреварувања во организација на ФФМ, потоа распоред од календарот на натпреварувањата во домашните првенства итн. Во рамки на своите надлежности кои се однесуваат пред се на заштита на интегритетот на натпреварувањето, ФФМ целосно соработува со МВР и органите на Министерството во тој дел, информираа од ФФМ.
Постапката е иницирана по добиени информации и препораки од „Спортрадар“, тело на Интерпол и УЕФА чија цел е борбата против наместени натпревари.