Напаѓачот на Јувентус, Паоло Дибала е на мислење дека Лионел Меси е најдобриот фудбалер во историјата и изрази радост дека ќе има можност да игра заедно со него на претстојниот Мундијал во Русија. Дибала изјави дека сите во Аргентина ќе се обидат да му помогнат на Меси во обидот да освои нешто битно во дресот на националниот тим.
– Да тренираш со Меси и да имаш можност да го гледаш секој ден е нешто уникатно. Можеш да научиш многу за квалитетите кои ги поседува. Сите сакаме да бидеме крунисани како светски шампиони. Нема да биде воопшто лесно, но го имаме најдобриот фудбалер во историјата. Ќе направиме се што е во наша моќ да го оствариме тоа, изјави Дибала за „Кадена 3“.
Напаѓачот додаде дека кај секој постои огромна желба да му помогнат на асот на Барса да постигне нешто со националниот тим.
– Ние ќе се обидеме да му помогнеме кога сме на теренот. Секој сонува да го има најдобриот играч во историјата на фудбалот во својот состав и сите сакаат тој да биде светски шампион, заклучи напаѓачот на Јуве.