Голманот на Барселона Клаудио Браво ќе паузира три недели поради повреда на мускулот на десната нога, соопшти денеска неговиот агент Кристијан Огалде.
Браво се повреди во понеделникот на тренинг, но од каталонскиот клуб не соопштија колку чилеанскиот репрезентативец ќе отсуствува од терените.
– Бевме загрижени кога се повреди Клаудио, но потоа беше добро. Повредите на листот се случуваат без посебна причина. Разговаравме со него и тој беше смирен. За три недели ќе биде 100 отсто подготвен, изјави Огалде за чилеанското радио Кооператива.
Браво е првиот голман на Барселона само во Примера. Тој ќе ги пропушти натпреварите со Атлетико Мадрид, Леванте, Селта и Лас Палмас.
Ова значи дека германскиот голман Андре Тер Штеген кој е прва опција за Копа дел Реј и Лигата на шампионите, ќе брани и во Шпанското првенство.