Велшкиот фудбалски ас Герет Бејл се очекува викендов да го комплетира трансферот од Тотенхем во редовите на Реал Мадрид, кој ќе биде рекорден во историјата на фудбалот и со кој тој ќе стане најскапиот играч воопшто досега.
Сумата на трансферот британските медиуми пренесуваат дека ќе изнесува 93 милиони фунти, нешто повеќе од 108 милиони евра, со што за 14 милиони евра се урива досегашниот рекорд, што го држеше Кристијано Роналдо со трансферот од Манчестер јунајтед исто така во Реал пред четири години.
По многуте варијатни за комплетирање на трансферот во изминативе два месеци, по се изгледа дека во него нема да бидат инволвирани други фудбалери, туку „кралевите“ на газдата на Спарси Даниел Леви ќе му исплатат кеш.
Реал, кој веќе започна да продава дресови со името на Бејл, се надева дека ќе го официјализира викендов, иако тоа било планирано за вчера, но било одложено со ревијалниот дуел против Ал Сад на кој фановите се збогуваа со легендата Раул.