Голем рез во својот состав најавува шпанскиот фудбалски гигант Барселона. Според информациите пласирани во дел од шпанските медиуми тренерот на Каталонците Тито Виланова планира за следната сезона да формира селекција од 22 играчи и нема да смета на услугите на останатите кои нема да влезат во неговата комбинација.
Поддршка за ваквиот план на тренерот му искажал и претседателот на клубот Сандро Росел кој потврдил дека „јадрото“ на тимот ќе биде редуцирано.
По завршувањето на сезоната, со активен договор се 36 фудбалери, така што 14 од нив ќе бидат ставени на продажба.
Меѓу најсериозните кандидати за напуштање на „Камп Ноу“ се следниве седуммина: Давид Виља, Виктор Валдез, Исак Куенка, Ибрахим Афелај, Андреј Фонтас, Алексис Санчез и Адриано.