Со висока победа од 6:0 остварена синоќа на пријателскиот натпревар против англискиот второлигаш Борнмаут, Карло Анчелоти дебитираше на клупата на Реал Мадрид, а веднаш по тој дуел го посочи Кристијано Роналдо како главен играч на „кралскиот клуб“.
– Задоволен сум од прикажаното на првиот подготвителен натпревар на кој Роналдо докажа дека е најважниот играч во тимот. Не се сомневам дека тој ќе остане во Реал.
– Фудбалерите кои играат за овој клуб поседуваат високи професионални и човечки квалитети и јас сум среќен што имам можност да работам со нив. Нема потреба да носиме нови играчи, истакна Италијанецот од кого навивачите на Реал очекуваат да ја врати шампионската титула во Мадрид.
Шпанските медиуми шпекулираат дека Анчелоти го сопрел трансферот на Гонзало Игуаин во Наполи по неговата одлична игра и постигнатиот гол на натпреварот со Борнмаут. Освен Игуаин погодија и Роналдо два пати, Сами Кедира, Ди Марија и Касемиро.