Српскиот претседател Александар Вучиќ изјави дека утре ќе заседава Кризниот штаб и веројатно нема да биде воведен полициски час, но мерките ќе бидат заострени во Белград, нагласувајќи дека не добил поддршка да се воведе полициски час, но тој и понатаму смета дека тоа треба да се направи.
Вучиќ на прес-конференција истакна дека во последните 24 часа се потврдени 357 новозаразени, а 11 луѓе починале. Според него, Белград е најголем проблем и бројот на заболените се зголемува, а во врска со мерките имал претходни тешки разговори со премиерката Ана Брнабиќ и со министерот за здравство Златибор Лончар.
Тој укажа дека и понатаму смета дека полицискиот час е неопходен, имајќи ја предвид тежината на ситуацијата и дека во болниците веќе нема слободно место, но и дека за забрана на движењето е потребно да се воведе вонредна состојба.
– На овој начин се плашам дека им одиме на рака на сите кои сакаат да им се додворат на луѓето, а тоа нема да доведе до брзо оздравување и спречување на заразата, предупреди Вучиќ, додавајќи дека морал јавно да го изнесе својот став, па дури и да биде мета на напад.
Шефот на српската држава изјави дека „ќе го почитува и прифати мислењето на струката, дури и по она што се случи синоќа“, објаснувајќи дека силата на неговиот тим е во тоа дека не одлучува тој сам, туку го почитува мнозинството и колегите.