Во Јужна Митровица попладнево се појавиле летоци на кои групата „Оштима“ повикува „на мобилизација“, како и на патролирање во деловите од северот на Косово, каде што живеат Албанци, пренесува „Коссев“.
Движењето „Оштима“, кое го потпишува овој проглас, како причина за тоа ги наведува заканите по територијата и албанскиот народ, кои ги виделе во најавите на одредени политичари за „корекција на границите“. Тие повикуваат граѓаните кои „ја чувствуваат албанската крв во своите вени“ да се организираат и патролираат.
Оваа група на мобилизација повикува поради „сомнителни лица“ за кои тврдат дека се забележани во селата во северот на Косово и кои наводно лажно се претставувале и зборуваат српски.
Овие личности, според „Оштима“, ја обележуваат територијата која сакаат да ја окупираат. До сега, институциите на Косово за ова немаат никаков коментар.