Во кампањата за претстојните предвремени парламентарни избори во Бугарија, кои ќе се одржат на 11 јули за состав на 46. Национално собрание, се вклучуваат 18 партии и девет коалиции. Тие ќе се борат за поддршката на 6.732.316 запишани гласачи во земјата.
Ова ќе бидат први избори во Бугарија на кои гласањето ќе се одвива целосно машински, освен на избирачките места во кои се запишани помалку од 300 луѓе.
Сè уште не е познато која компанија ќе купи дополнителни над 1.500 гласачки машини и каде ќе бидат складирани во периодот пред одржувањето на изборите.
Централната изборна комисија на Бугарија соопшти дека ќе обезбеди околу 2,5 милиони евра за одржување на машините за гласање.
Нема да има ограничување за гласањето од страна на бугарските граѓани кои живеат во странство, но тие ќе можат да гласаат со хартиени ливчиња.
Се очекува најмногу избирачки места да бидат отворени во Турција, Велика Британија, Германија и Шпанија. Во Северна Македонија ќе може да се гласа во Бугарската амбасада во Скопје, Генералниот конзулат во Битола, како и во Струмица.
Според анкетите, од одѕивот би изнесувал меѓу 55-60 отсто, што ќе биде поголем од редовните парламентарни избори одржани на 4 април, кога беше 50 проценти.