Турција сака да организира меѓународна конференција за мир во Јемен, која би ги собрала сите страни во судирот и која би се одржала во Истанбул или во Ријад, изјави денеска во Москва претседателот на турскиот Парламент Чемил Чичек.
– Турција е подготвена да организира конференција со цел да се помогне во мирно решавање на судирот, изјави Чичек на прес-конференција во Москва, каде престојува во официјална посета.
– Оваа конференција би можела да биде организирана во Ријад или во Истанбул, додаде тој и прецизираше дека е неопходно шиитските бунтовници Хутите да ги ослободат освоените територии и да ги повлечат своите сили.
Чичек изјавата ја даде еден ден откако Советот за безбедност на Обединетите нации ја усвои резолуцијата, со која се бара од Хутите да се повлечат од јеменските зони, кои ги освоиле и со која се воведуваат санкции кон нив, меѓу кои и ембарго на оружје.