Специјални полициски единици за борба против демонстранти рано изутринава биле испратени во најголемото грчко пристаниште Пиреа, со цел да се стави крај на штрајкот на морнарите кој речиси една недела го спречува превозот со траекти до повеќето острови.
Полицијата треба да ја спроведе наредбата на грчката Влада, која стапи во сила утрово во четири часот. Со неа, врз основа на ретко применуваните прописи за вонредни ситуации, од штрајкувачите се бара да се вратат на работа.
На телевизиските снимки се гледа кордон на специјална полиција распореден во пристаништето меѓу штрајкувачите и бродовите кои примаат патници и стока.
Синдикатот на морнарите протестира поради реформата, со која им е дозволено на сопствениците на траектите да одредуваат број на членови на екипажот во зависност од должината на патувањето.