Собранието на Косово денеска би требало да го разгледа предлог законот за амнестија кој произлезе од бриселскиот договор од 19-ти април помеѓу Белград и Приштина.
Заменик премиерот и министер за правда, Хајредин Кучи изјави дека на 4-ти јули на дневен ред на седницата на Собранието на Косово ќе се најде предлог законот за амнестија.
-Минатата недела обезбедивме согласност со лидерите на ДПК и ДСК и добивме поддршка од амбасадорите на државите на големата петорка, законот да се најде на дневен ред- изјави Кучи.
Претседателот на владата на Србија, Ивица Дачиќ, вчера истакна дека законот за амнестија е важен за Србите на Косово и Метохија.
–Тоа значи дека на КиМ ќе биде прогласена амнестија за многу кривични дела на кои би можеле да им подлегнат Србите и сите оние кои не ја признаваат независноста на КиМ – изјави Дачиќ.
Тој истакна дека усвојувањето на законот има голема важност и за вработување на Србите во одредени институции како што се полицијата и правосудството.
Предлог законот за чие усвојување е потребно двотретинско мнозинство во Собранието на Косово, предвидува сите извршители на кривични дела на територијата на Косово кои се набројани и извршени до 20 јуни 2013 година во потполност да се ослободат од кривично гонење или извршување на пресудата.
Елена Георгиевска