Вкупно 4.363 потенцијални имигранти биле запрени од крајбрежната стража и полицијата во Грција во првите четири месеци од оваа година. Тоа е за 142 луѓе повеќе отколку во истиот период лани, објави весникот „Катимерини“.
Според извори од крајбрежната стража, голем број потенцијални имигранти чекаат на брегот на соседна Турција за да се качат на чамци и мали бродови и да заминат кон Грција или Италија.
Според изворите, секој имигрант плаќа меѓу 1.500 и 4.500 евра на трговците со луѓе.
Крајбрежната стража побара помош од армијата и од военопоморските сили за да ги зголеми напорите за следење на бродовите и чамците со кои се врши трговијата со имигранти.