Грчкиот премиер Андонис Самарас истакна вчера дека е решителен да се бори против зајакнувањето на неонацизмот во земјата, откако неговите напори во таа насока беа доведени во прашање на Интернет и во странство поради неговото отфрлање на антираристички нацрт-закон.
Несогласувањето во однос на законот се појави во понеделникот меѓу лидерите на трите партии од владината коалиција – Андонис Самарас, Евангелос Венизелос, лидерот на ПАСОК и Фотис Кувелис, лидерот на ДИМАР.
ПАСОК и ДИМАР го доставија вчера во Парламентот антирасистичкиот закон, без поддршка на Нова Демократија. Самарас го заштити својот став во писмото до поетот Нанос Валаортис, објавено вчера.
– Ние треба да го обединиме народот против нацистите, а не да го разделуваме пред опасноста од неонацистите, посочува премиерот во писмото.
Поетот изрази загриженост поради полето на дејствување, што и е овозможено на неонацистичката партија „Златна зора“.
Меѓу напорите, кои треба да бидат преземени, Самарас ја истакна борбата против масовната нелегална имиграција.
– Ние треба да им го одземеме на неонацистите главното нивно оружје, нагласа Самарас во писмото.
Тој додаде дека неговата партија ќе предложи подобрување и актуелизирање на постоечката правна рамка, која датира од 1979 година.