Трите косовски опозициски парламентарни партии, кои се против формирањето Заедница на српски општини, денеска започнаа штрајк пред полицијата со барање да бидат пуштени од притвор петмина пратеници од нивните редови.
Како што јавува „Косова Прес“, активисти на Самоопределување, Алијанса за иднината на Косово и Иницијатива за Косово, во рацете носат транспаренти со натписи „Слобода за пратениците! Долу диктатура!“ и „Нема насилство кое ќе не сопре“.
Демонстрантите ги фрлале транспарентите пред полицискиот кордон со кој е блокиран влезот во полициската станица во центарот на Приштина, пренесува Танјуг.
Ова е само еден, од низата штрајкови на косовските опозиционери кои во последните три ипол месеци ја блокираат работата на парламентот, барајќи поништување на бриселскиот договор за формирање на Зедница на српски општини во Косово.
Пет опозициски пратеници, кои во повеќе наврати ја прекинуваа седницата на парламентот со фрлање на солзавец, уапсени се под обвинение за предизвикување на општа опасност.
Меѓу нив е и поранешниот лидер на Самоопределените, Албин Курти, додека двајца пратеници се во бегство.