Тројниот убиец Михаил Шабуњин, осомничен дека убил тројца мажи на стрелиштето „Чешка зброевка“ кај Даниловград во Црна Гора, извршил самоубиство откако полицијата го опколила при обидот за апсење во шумата над Херцег Нови. За време на апсењето, Шабуњин отворил оган кон полицијата.
Директорот на Управата на полицијата, Лазар Шќепановиќ, денеска изјави дека апсењето на тројниот убиец било сложена операција бидејќи не бил познат мотивот за убиството, ниту сторителот, кој имал предност бидејќи успеал да побегне пред полицијата да ги открие телата.
Шќепановиќ, во утринската програма на ТВЦГ, изјави дека рускиот државјанин Михаил Шабуњин прво го убил најискусниот инструктор на стрелиштето, а потоа и двајца млади мажи.
Според досегашните сознанија, Шабуњин немал криминално досие, а Агенцијата за национална безбедност (АНБ) побарала меѓународни проверки за да се изготви профил на убиецот.
Шќепановиќ изјави дека ниту еден полицаец не бил повреден при рафалната стрелба што Шабуњин ја отворил кон полициските службеници.
Тој истакна дека задачата на полицијата била сложена бидејќи не биле познати ниту мотивот ниту сторителот. Особено предизвикувачки било тоа што убиецот имал предност пред полицијата откако побегнал од местото на злосторството. Сепак, неговиот идентитет бил утврден за само еден час.
„Стануваше збор за непредвиден настан што не можел да се спречи, ниту можела да се утврди потенцијалната опасност, особено затоа што по спроведената криминалистичка обработка било утврдено дека осомничениот комуницирал со жртвите на 24 август, дека ги користел услугите на стрелиштето и ја искористил довербата на работниците, односно вработените на стрелиштето. Без никаква причина, што можело веднаш да се види на надзорните камери, прво лишил од живот едно лице, а потоа уште две лица во објектот, во канцеларијата каде што го задолжувал оружјето и муницијата“, рече Шќепановиќ.
По тоа, осомничениот зел одредена количина муниција, зел возило и се упатил во непознат правец.
Шќепановиќ истакна дека Шабуњин повеќепати влегувал во Црна Гора и го пријавувал престојот кај сопственикот на станот во кој престојувал.
„Немаме информации дека имал криминално досие. АНБ побара меѓународни проверки за да утврдиме за каков профил станува збор. Штом го изготвиме профилот, ќе ја информираме јавноста“, рече тој.
Додаде дека е важно да се откријат мотивот и причините за злосторството.
„Треба да откриеме кои околности влијаеле врз сторителот да изврши кривично дело врз вработените на стрелиштето „Чешка зброевка“, имајќи предвид дека станува збор за луѓе кои немале никакво досие, туку биле чесни граѓани кои работеле на стрелиштето како инструктори и лица задолжени за логистика“, рече Шќепановиќ.
При потрагата во населбата Топла била поставена тактичка блокада, со што било ограничено движењето на напаѓачот и тој бил доведен во безизлезна ситуација.
„При пукањето кон полицијата не бил повреден ниту еден полициски службеник. Користевме тактичка заштитна опрема. Припадниците на Специјалната полициска единица беа на првата линија, додека во вториот ешалон беа припадници на Посебната полициска единица, Регионалниот центар „Југ“ и Граничната полиција. Тактичкото распоредување на службите беше на високо ниво. Осомничениот беше во ситуација во која операцијата мораше да заврши со употреба на огнено оружје од страна на полицијата, но тој успеа да изврши самоубиство на лице место“, рече директорот на полицијата.
Шќепановиќ додаде дека обрачот околу убиецот бил таков што тој можел само да се предаде или да биде совладан, но тој одлучил да изврши самоубиство.
Тој нагласи дека стрелиштето „Чешка зброевка“ е цивилно стрелиште во кое работат стручни лица.
„Вчера имавме опасни изјави од поединци кои укажуваа на наводни аномалии во Законот за оружје. На стрелиштето постои сеф за оружје кое им се распределува на кандидатите. Во такви околности, рускиот државјанин ги лишил од живот најискусните лица, особено инструкторот кој прв бил убиен, а потоа и другите две лица.
Тука треба да направиме разлика меѓу Законот за оружје и неговата примена, која треба да придонесе за подобрување на безбедносната состојба, и непредвидливите ситуации“, рече директорот на полицијата, а пренесе РТЦГ.