По локалните избори во Косово, кои треба се одржат на 3 ноември, постои можност следната пролет да бидат закажани и предвремени парламентарни избори, оценуваат косовски политичари и аналитичари.
Според радио „Слободна Европа“, Владата на премиерот Хашим Тачи ја губи поддршката на мнозинството, а моментно постојат неколку варијанти за решавање на проблемите.
Првата можност е реконструкција на косовската Влада, што ќе подразбира вклучување на некоја од опозициските партии во власта. Втората е опозицијата да формира времена влада до изборите, а третата е сегашната Влада да продолжи да работи, но да се договори со опозицијата околу датумот за следните избори и за некои изборни реформи.
Лидерот на Алијансата за иднината на Косово, Рамуш Харадинај по враќањето од посетата на САД истакна дека најдобро решение е опозицијата да формира нова влада.
– Ние се согласуваме тоа да се случи по локалните избори. Ќе почекаме да видиме како ќе одлучат граѓаните, но сметам дека е многу подобро за Косово да има влада формирана од сегашната опозиција, нагласи Харадинај.
Аналитичарот Дритон Селманаи од Косовскиот демократски институт смета дека Владата го загубила мнозинството и опстојува единствено благодарение на опозицијата, која „не е решителна да ја предизвика“.
– Решението може да биде распуштање на Парламентот и распишување предвремени избори, оцени Селманаи.
Проблем за Демократската партија на Тачи е и тоа што нејзината парламентарна група се подели, што го доведува во прашање опстојувањето на коалициската Влада до крајот на нејзиниот мандат, наведува радио „Слободна Европа“.