Поранешниот грчки премиер социјалистот Јоргос Папандреуго обвини својот претходник, конзервативецот Костас Караманлис, за економската криза оценувајќи ја политиката на неговата влада како „криминална“, објави грчкиот сајт „Капитал“.
Во писмена изјава поранешниот премиер наведува дека уште од првиот мандат зборувал за реалната состојба на грчката економија и дека барал дополнително време од европските партнери за да ги реши проблемите на земјата.
Папандреу, меѓу другото, ја обвинува владејачката партија до 2009 година и дел од медиумите дека ширеле гласини дека неговата Влада фабрикувала статистички податоци за буџетскиот дефицит и дека целта на овие забелешки било да се дискредитира управувањето на социјалистите.
Поранешниот премиер смета дека партнерите на Грција првично покажале смиреност, потоа страв и неодлучност и на крајот се држеле рамнодушно во однос на нападите на пазарите против Грција, додека во исто време аналитичарите целата вина ја префрлиле само врз него.