Лидерот на партијата на турското малцинство во Бугарија, Движењето за правата и слободите (ДПС) Ахмед Доган денеска е нападнат додека го читал извештајот за време на Осмата национална конференција на движењето, јави БТА.
Доган е нападнат со пиштол на гас додека зборувал пред делегатите на форумот. Новинарите веднаш забележале дека еден од присутните се приближува кон говорницата каде што се наоѓал лидерот на ДПС, а на телевизиските снимки се гледа дека Доган самиот му го одзема пиштолот од рака на напаѓачот, кој бил веднаш совладан и легнат на земја, по што бил физички нападнат од учесниците на конференцијата.
Напаѓачот е 25-годишниот Октај Енимехмедов од Бургас, кој е регистриран како делегат на партијата од овој град. По нападот момчето е однесено во полиција, а кај него биле пронајдени пиштол на гас и два ножа. Енимехмедов има криминално досие, а на полицијата и е познат како хулиган, учесник во тепачки и кражби.
– Ахмет Доган беше веднаш изнесен од салата. По медицинскиот преглед е утврдено дека нема повреди и здравствената состојба му е добра, изјави заменик претседателот на партијата Љутви Местан.
Ахмет Доган е долги години во политиката и е симптоматична фигура од корумпираниот сплет на политички и економски интереси, па затоа е и разбирлива поврзаноста на многу бугарски политичари со него.