Солзавецот повторно се врати во косовскиот Парламент и тоа во момент кога Комисијата за надворешни работи го разгледуваше предлог документот за демаркација на границата со Црна Гора, објавија приштинските медиуми.
Полицијата е во потрага по претставникот на опозициското движење Самоопределување, Дритон Кауши, кој се обидел со солзавец да го спречи усвојувањето на овој документ.
Сепак документот е усвоен со шест гласови, а на состанокот присуствувале пет пратеници на Самоопределување.
Договорот за демаркација на границата со Црна Гора, кој е потпишан минатиот август во Виена, треба да се најде на дневен ред на косовскиот Парламент в четврток.
Овој документ е многу важен за Приштина, бидејќи од неговото усвојување зависи дали Брисел ќе одобри визна либерализација за косовските граѓани.