Грчката партија Нова демократија ги чека официјалните резултати од предвремените парламентарни избори, изјавија претставници на партијата додавајќи дека излезните анкети не се официјални изборни резултати.
– Според анкетите, Сириза има предност, ние не се сомневаме во тоа. Сепак, ние упатуваме на тоа дека во минатото излезните анкети не го рефлектираа крајниот резултат. Со оглед на тоа што не ја знаеме разликата, ќе мора да почекаме, изјави извор од Нова демократија за грчките медиуми.
Според него, постои и друга излезна анкета на „Капа рисрч“, според која Нова демократија освоила 25 до 28 проценти, а Сириза 33,5 до 37 проценти.
– Ќе ги почекаме крајните бројки за да извлечеме заклучок за изгубените гласови во споредба со претходните избори. Како и да е, имаше висока стапка воздржани граѓани, изјавил истиот извор.