Косовскиот премиер Иса Мустафа изјави дека оваа влада ќе останe до крајот на мандатот, истакнувајќи дека била погрешно интерпретирана изјавата на Кадри Весели, лидер на Демократската партија и прв парламентарец, оти потребни се нови избори за земјата да дојде во нормала.
Шефот на косовската влада оценува дека коалицијата Демократска партија-Демократски сојуз функционира добро и како коалициски партнери никогаш не разговарале за предвремени избори.
– Никогаш не сме разговарале за избори. Функционираме повеќе од добро. Демократската партија и Демократскиот сојуз, како владина коалиција, ќе останат до крајот на мандатот. Изборите ќе се одржат онака како што е предвидено, значи по завршување на мандатот, изјави Мустафа за косовската телевизија.
Тој искажа убеденост дека изјавата на Кадри Весели за предверемни парлменатрни избори е погрешно разбрана.
– Изјавите во медиумите често се погрешно толкувани и им се дава поинаква насока, истакна Мустафа.