Поранешниот хрватски претседател Стјепан Месиќ смета дека Хрватска треба да ја спроведе одредбата од Уставниот закон за правата на националните малцинства.
-Никој во Вуковар не се бори против кирилица, туку против агресијата на ЈНА и паравоените организации. ЈНА службено го користеше екавскиот говор и латинично писмо. Затоа тие што велат дека во Вуковар се води војна против кирилицата, лажат –изјави Месиќ за „Нов лист“.
Зборувајќи дека Хрватска денес е правна држава, Месиќ рече дека некој сака државата која влегува во Европската унија да не ги спроведе своите закони.
Тој додаде дека воведувањето на двојазичност нема никаква врска со сегашната власт, бидејќи законот е донесен уште пред 11 години.
„Нов лист“ пренесува дека организаторите на антикириличниот протест кој се одржа минатата сабота, се сретнале со претседателот на Хрватска, Иво Јосиповиќ и шефот на Сабор, Јосип Леко.