Во предградието на Атина се случи брутално убиство, при што загина Премислав Језиорски (43), професор на Факултетот за бизнис Хаас при Универзитетот во Калифорнија, Беркли.
Маскиран напаѓач го застрелал од блиску, испукувајќи пет куршуми во градите и вратот додека Језиорски стоел пред куќата на неговата поранешна сопруга. Нападот се случил сред бел ден, а грчката полиција потврди дека професорот починал на местото на настанот, објавува „Њујорк пост“.
Напаѓачот избегал пеш по убиството. Сведоците го опишале како висок, атлетски маж. Грчката полиција сè уште активно го бара сторителот. Језиорски бил во Грција за судски случај на кој се одлучувало за старателството над неговите деца.
По трагедијата, неговиот брат Лукаш Језиорски се вклучил на платформата WhyDonate, каде што семејството собира пари за покривање на судски трошоци, репатријација на телото и други трошоци.
„Нашето семејство е скршено и правиме сè што можеме за да се обезбеди правда“, напишал неговиот брат.
„Пржемек беше грижлив татко на две мали деца и сакан професор. Тој беше водечки експерт во областите на маркетинг науката, индустриската организација и анализата на податоци“, додаде тој.
„Скршени сме од веста за трагичната и ненадејна смрт на професорот Пржемислав Језиорски. Нашиот фокус сега е на поддршка на заедницата. Многу ќе ни недостига“, рече деканката на Факултетот за бизнис Хаас, Џенифер Чатман.