Австрискиот канцелар Себастијан Курц се закани со вето ако Европската комисија инсистира на својот предлог земјите-членки да плаќаат 1,11 проценти од нивниот БДП во буџетот на Унијата.
Курц за австриското радио „Ое1“ изјави дека Европската комисија, доколку поднесе таков предлог, нема да добие поддршка од Виена.
За нас се неприфатливи тие 1,11 отсто. Ќе ставиме вето, порача австрискиот канцелар.
„Der Beitrag von 1,11 % zum #EU-Budget ist für uns immer noch nicht akzeptabel. Wenn dieser Vorschlag eingebracht wird, wird es hier keine Zustimmung von uns geben." Das ganze Gespräch mit @sebastiankurz im #JournalzuGast zum Nachhören: https://t.co/CCS3dUPiF8
— Volkspartei (@volkspartei) February 1, 2020
Во исто време, тој посочи дека се уште се водат преговори и се надева дека ќе се направи нов предлог што ќе биде прифатлив.
За 20 февруари е закажан вонреден самит на ЕУ за финансиската рамка за периодот од 2021 до 2027 година.
Повеќе држави односно оние што плаќаат повеќе отколку што добиваат од буџетот на Унијата, сакаат да остане членарината на 1 отсто БДП, но Европската комисија предлага 1,11 отсто, а Европскиот парламент бара 1,3 процент.