ЕУ ќе ја зголеми финансиската поддршка за палестинските власти со тригодишен пакет помош во вредност од околу 1,6 милијарди евра, изјави денеска европската комесарка за Блискиот Исток Дубравка Шуица.
Таа во интервју за Ројтерс нагласи дека ЕУ ќе обезбеди финансиска поддршка на палестинската самоуправа додека реформите на таа администрација, кои според неа многумина ја критикуваат за корупција и лошо управување, продолжуваат.
Шуица посочи дека без реформи, палестинските власти нема да бидат силен и кредибилен соговорник не само за ЕУ, туку и за Израел.
Таа рече дека просечната годишна поддршка на ЕУ за палестинската управа е околу 400 милиони евра во изминатите 12 години.
Во Луксембург денеска ќе се одржи првиот политички дијалог на високо ниво меѓу министрите за надворешни работи на ЕУ и високи палестински претставници, вклучително и премиерот Мохамед Мустафа.
ЕУ е најголемиот донатор за Палестинците, а европските претставници се надеваат дека палестинската управа, која управува со окупираниот Западен Брег, еден ден ќе ја преземе одговорноста за Појасот Газа по завршувањето на војната меѓу Израел и палестинската милитантна група Хамас.