Парламентот на српските општини во северно Косово денеска едногласно изгласа Србите да ги бојкотираат локалните избори во Косово, што треба да се одржат на 3 ноември.
Вкупно 91 пратеник од привременото собрание на косовските Срби на средба во градот Звечан гласаа во полза на резолуцијата, и покрај притисокот од страна на српската Влада.
Тие изјавија дека планираните избори ги нарушуваат српските закони и ќе доведат до идно меѓународно признавање на Косово.
Пратениците изјавија дека неуспехот на српскиот Уставен суд да се произнесе по законитоста на бриселскиот договор предизвикал „непоправлива политичка и правна штета“.
– Претставници на Србите нема да учествуваат на локалните избори во Косово бидејќи тоа би значело дека државата Србија во целост би се повлекла од јужната српска покраина, изјави денеска началникот на Косовско-митровскиот округ Раденко Недељковиќ.