Протестите во Приштина ќе продолжат се додека косовската Влада не поднесе оставка и не ги поништи спогодбите за формирање Заедница на српски општини и за демаркација на границата со Црна Гора, најавија денеска лидерите на опозицијата.
Лидерите на движењето „Самоопределување“, Алијанса за иднината на Косово и Иницијативата за Косово на плоштадот во близина на зградата на косовската Влада и Собранието денеска одржаа прес конференција на која кажаа дека во саботата бил одржан досега најголемиот опозициски собир на Косово, на кој граѓаните покажале дека се против Владата и Заедницата на српски општини.
Висар Имери, Рамуш Харадинај и Фатмир Лимај додадоа дека во токот на протестот група хулигани се судриле со полицијата, пренесе РТС.
-Граѓаните вчера испратија две пораки. Дека не ја прифаќаат спогодбата и јавно повикаа на оставката на (премиерот) Иса Мустафа и на (шефот на дипломатијата) Хашим Тачи. Тоа што го видовме вчера покажува дека оваа влада ја загубила поддршката од народот. И покрај клеветите граѓаните не можат да бидат запрени, рече Лимај, лидерот на Иницијативата за Косово.