Портпаролката на Европската Унија Маја Коцијанчич ги отфрли обвинувањата на Белград дека за Каталонија, односно Шпанија, важат други стандарди од оние кои важеа за Србија во случајот со Косово и истакна дека меѓународното право е универзално и дека ЕУ „во целост го почитува“.
Коцијанчич по повод вчерашниот став на Европската Комисија дека случаите на Косово и Каталонија се неспоредливи, во изјава за Танјуг истакна дека во ЕУ не постојат двојни стандарди.
– Косово е единствен случај. Како што потврди и Европскиот Совет, тој како таков не може да се спореди со која било друга ситуација. Нема двојни стандарди. Меѓународното право мора да биде универзално применето, а ЕУ во целост го почитува, се наведува во писмениот одговор на Коцијанчич за Танјуг.
Српскиот претседателот Александар Вучиќ, вчера оцени дека ставот на Европската комисија оти референдумот за независност на Каталонија е нелегален, е најдобар пример за двојните стандарди и лицемерието на светската политика.
– Како тоа во Каталонија не важи референдумот, а Косово може и без референдум, праша Вучиќ на заедничката прес-конференција со грчкиот претседател Прокопис Павлопулос.
– Си играа со судбините на државите кога ги прекројуваа границите на Балканот, а денес не им е до игра, кога мечката тропна на нивна врата. Сега ситуацијата е многу сериозна, истакна Вучиќ.