Хрватската претседателка Колинда Грабар Китаровиќ изјави денеска во Вараждин дека сите држави, кои сакаат да бидат членки на Европската унија мораат да ги исполнат критериумите и оти не гледа зошто тоа не би можела да биде и Србија.
Китаровиќ ја коментираше блокадата на поглавјето 26 во преговорите со Србија, изјавувајќи дека ако некоја држава сака да биде членка на ЕУ мора да го помине истото што го минале и другите земји членки.
– Хрватска мораше да ги исполни сите критериуми, имавме многу потешкотии, имаше блокади, кои ги сметавме за неправедни, но во овој случај станува збор за критериуми, кои е лесно да се исполнат. Не гледам поради што Србија тоа не би можела да го исполни, рече таа.
Хрватска го блокираше отворањето на поглавјето 26, а премиерот на Србија Александар Вучиќ по најавата дека ќе го напушти Брисел и дека денеска нема да присуствува на Меѓувладината конференција, доколку Хрватска не ја повлече блокадата, синоќа си замина за Белград.
Вучиќ синоќа изјави дека му е доста од „хрватското изживување“.