Република Кипар објави дека ќе блокира отворање нови поглавја во преговорите за членство на Турција кон Унијата како одговор на акциите на Анкара во јужните делови од островот за пронаоѓање гас и нафта.
Тоа е една од мерките одобрени од Националниот совет на Кипар, главен консултативен орган на претседателот во кој учествуваат лидери на сите парламентарно претставени партии.
Претседателот на Кипар, Никос Анастасиадис ќе поднесе жалба против Турција на средбата на врвот на ЕУ подоцна во оваа недела.
Официјални жалби ќе бидат поднесени и до Одделот на ОН за океански прашања и морско право, до Меѓународната морска органзиација и веројатно до Советот за безбедност на ОН.
Главниот обвинител на Кипар и меѓународни правни фирми ќе анализираат можни судски постапки против Турција.
– Кипар ќе преземе чекори пред меѓународни органзиации кои ќе ја принудат Турција да плати за цената на своите незаконски постапки, изјави портпаролот на Кабинетот на кипарскиот претседател.