Грчкиот министер за одбрана Панос Каменос изјави дека Грција е подготвена да ги даде на користење воените бази, како и да соработува со силите за безбедност за зголемување на безбедноста во регионот и за зајакнување на борбата против тероризмот, пишува грчкиот весник „Катимерини“.
Каменос, исто така, нагласи дека НАТО треба да ја преиспита својата политика на јужниот дел.
– Грција е подготвена да преземе таква иницијатива во јужниот дел на НАТО, изјави вчера Каменос на конференција за одбрана и безбедност во Атина.
Весникот „Катимерини“ наведува дека постои загриженост меѓу владините претставници поради изјавите на министерот за одбрана, бидејќи позициите по тоа прашање на премиерот Алексис Ципрас и на министерот за надворешни работи Никос Коѕиас се различни.