Со влезот во Европската унија остварен е еден национален консензус, но недостатокот од долгорочна стратегија доведува до повремени проблеми, па така „ситуацијата не е розова, но не е ниту сосема црна, изјави хрватскиот претседателк Иво Јосиповиќ по повод првата година на хрвасткото членство во ЕУ.
Тој наведе дека Хрватска се соочува со проблеми бидејќи е една од ретките држави која не формулирала своја стратегија до 2020 година.
Според шефицата на хрватската дипломатија Весна Пусиќ, Хрватска во првата година била поуспешна од другите земји, а посебно ја истакна хрватската иницијатива за Западен Балкан.
– Во Западен Балкан никој не дејствуваше како стабилизатор и не ја артикулираше европската политика, ниту влијаеше на артикулација на европската политика во тие земји…Хрватска се сврти кон соседството бидејќи не можеш да имаш сигурна куќа ако соседот не е сигурен, посочи Пусиќ.
Таа истакна декаХрватска влијаела и на промена на ставот на ЕУ кон Босна и Херцеговина.
Хравстскиот министер за финансии Борис Лаловац наведе дека државата била „финансиски шокирана“ со влезот во ЕУ, но оти „каматната стапка на задолженост денес е на историско ниско ниво“.
И потпретседателот на хрватската Влада задолжен за економијата Бранко Грчиќ изрази оптимизам дека „во следните пет години сигурно ќе биде подобро“.
Но, аналитичарите потенцираат поинакво мислење. Жарко Пуховски оцени дека „политичката и идеолошката слика покажува дека се нарушени меѓународните односи, а репресијата кон малцинствата е значително поголема од претходно“.
Психологот Мирјана Кризманиќ наведе дека во хрватското општество постои „депресија која често преминува во апатија, а може да премине и во бес и лутина“ со кои може да се манипулира.