Собранието на Албанија едногласно го донесе Законот за враќање на македонското име на општина Пустец, чие претходно албанизирано име беше Ликенас, јави Канал 77.
„Неправдата е исправена. Ова е историска придобивка на Македонците во Албанија и поттик за натамошно унапредување на положбата и правата на Македонците. Ние сме лојални граѓани на Република Албанија, таа е наша татковина, и оваа одлука на Собранието на Албанија е заслужена и долгоочекувана“, изјави градоначалникот на општина Пустец, Едмонд Темелко кој воедно е и лидер на партијата на Македонците во Албанија Македонска алијанса за европска интеграција (МАЕИ).
Петходно во четвртокот лидерот на албанската опозиција Еди Рама, и покрај тоа што неговите пратеници се спротиставија во законодавноправната комисија на албанското собрание за општината Пустец и официјално да си го врати името наместо Ликенас, даде зелено светло дека неговите пратеници ќе го поддржат предлогот Пустец да биде официјално име на општината во која живеат Македонци.