Косовскиот премиер Иса Мустафа денеска повторно ја повика опозицијата на дијалог за проблемите кои ги оптоваруваат, а за кои, како што се наведува, треба да се најде решение во согласност со законот, Уставот и правилникот за работа на косовскиот Парламент.
-Уште еднаш на опозицијата ќе и понудиме да седнеме и да разговараме за да пронајдеме решение. Сметаме дека најдобро е тоа да се направи со Собранието на Косово каде сите пратеници како претставници на народот можат да ги изнесат своите забелешки, сугестии и предлози, рече Мустафа на седницата на косовската Влада, пренесе Косова Прес.
Мустафа рече дека власта сака да најде институционално решение, веќе да нема солзавци во Собранието и тие слики да останат во минатото, а Собранието да продолжи да работи во полн состав.
Американскиот државен секретар Џон Кери во текот на вчерашната кратка посета на Приштина порача дека „на солзавецот не му е местото во Парламентот“, и дека формирањето на Специјален суд за воените злосторства на ОВК ќе ја стабилизира ситуацијата во Косово.