Во отворено писмо до турскиот премиер Реџеп Тајип Ердоган, објавено во британскиот весник „Тајмс“, група интелектуалци и уметници од целиот свет ги осудија насилните мерки на турските власти против демонстрантите во истанбулскиот парк Гези.
Тие ја оквалификуваат турската Влада како „диктаторски режим“ и го критикуваат односот на Ердоган кон барањата на демонстрантите.
– Наредбите на премиерот доведоа до смртта на петмина невини млади луѓе, се наведува во писмото и се додава дека тој може да биде повикан да даде објаснувања за полициското насилство пред Европскиот суд за човекови права.
Контрамитинзите, организирани од владејачката Партија на правдата и развојот, во посмото се поредуваат со Нирнбершките собири, организирани од нацистите во Германија во периодот од 1923 до 1938 година.
Во писмото се наведува и дека во Турција се осудени и затворени повеќе новинари. отколку во Иран и Кина заедно.
Меѓу потписниците на писмото се и актерите Шон Пен, Сузан Сарандон, Бен Кингсли и Ванеса Редгрејв, режисерите Дејвид Линч и Фуад Кавур, ирската писателка Една О’Брајан, британскиот пратеник лабурист Џереми Корбин и американскиот писател и новинар Клер Берлински.