Хрватското граѓанско здружение „Во име на семејството“ и предложи на Комисијата за правата на жените и рамноправност на половите во Европскиот парламент да гласа за забраната на сурогат мајките, како модерна форма на трговија со луѓе, јави Хина.
Во врска со претстојното гласање на нацрт-извештајот за борбата против трговијата со луѓе, хрватското здружение ги повика членовите на Комисијата независно од својата партиска припадност да прифатат дополнување кон извештајот, во кое ќе ја осудат праксата на сурогат мајки како трговија со мајките и со децата.
Здружението потсети дека со резолуција на ЕП од декември 2015 година е осудена праксата за користење на сурогат мајки, со која се поткопува достоинството на жената, чие тело и репродуктивни функции се користат како стока.
Хрватското здружение предлага со дополнување на нацрт-извештајот праксата на сурогат мајка да биде прогласена за „употреба на човечкото тело за финансиска или друга корист“, а земјите-членки да им забранат на европските држави, граѓани и фирми да се занимаваат со туризам, поврзан со оваа појава.