Хрватска од денеска станува 28-та земја членка на ЕУ, 22 години по прогласувањето на нејзината независност од поранешна Југославија.
Хрватска е втората поранешна југословенска република која станува членка на Унијата по Словенија, која се приклучи кон блокот во 2004 година. Ова е прво проширување на ЕУ по 2007 година, кога членки станаа Бугарија и Романија.
Хрватите веќе петта година по ред се наоѓаат во рецесија и имаат рекордна невработеност од 21 отсто. Но, и покрај тоа, илјадници граѓани синоќа со знамиња на ЕУ во рацете се собраа да го прослават влегувањето на земјата во Унијата на централниот плоштад во Загреб и ширум целата држава.
Во Загреб, во присуство на голем број странски лидери, се одржа богата музичка програма до полноќ, кога со огномет и исполнување на химната на ЕУ – „Одата на радоста“ од Бетовен беше одбележано официјалното присоединување на Хрватска кон ЕУ.
– Ние сме тука во оваа историска ноќ. Ваша беше желбата да се приклучите кон ЕУ и вашата макотрпна работа го овозможи тоа, изјави претседателот на Европската комисија Жозе Мануел Барозо пред илјадниците граѓани на плоштадот „Бан Јелачиќ“ во Загреб, поздравувајќи ги присутните на англиски и на хрватски јазик.
Хрватскиот премиер Зоран Милановиќ се осврна на „новата улога“ на Хрватска во регионот и кон земјите со кои била во конфликт – Србија, Црна Гора и БиХ.
– Ние треба да им подадеме рака на овие земји и да им помогнеме во адаптирањето кон европските критериуми, истакна Милановиќ.
Претседателот Иво Јосиповиќ нагласи дека Хрватска е веќе „целосно прифатен и рамноправен член на најуспешната Унија на европските држави, која некогаш постоела“.
Од денеска се отстрануваат царинските пунктови на хрватската граница со нејзините соседи од ЕУ, Словенија и Унгарија, а табли и знамиња на ЕУ се поставени на границите со БиХ, Србија и Црна Гора, кои не се членки на Унијата.
Хрватска поднесе барање за членство во ЕУ во 2003 година, а официјален статус на кандидат доби во 2004 година.
Преговорите за членство ги започна во октомври 2005 година, а тие завршија во 2011 година со потпишување на договорот со Брисел.
Ратификацијата на овој договор од страна на 27-те земји членки заврши во март, оваа година.