Еврокомесарот за проширување и соседска политика Јоханес Хан денеска доаѓа во посета на Сараево, каде што се очекува да одржи средби со босанските лидери и да разговара за реформите и процесот на евроинтеграција на Босна и Херцеговина.
Според босанските медиуми главна тема на неговата посета ќе биде Прашалникот на Европската комисија, од чие исполнување зависи дали земјата ќе добие статус на кандидат за членство во ЕУ.
„Дневни аваз“ пишува дека Хан доаѓа во „инспекција“ за да се увери до каде стигнала БиХ во исполнување на обврските од реформската агенда.
Се очекува еврокомесарот на босанските лидери да им ја пренесе и пораката од Брисел дека пресудите на Хашкиот суд мора да се почитуваат и дека тие не смеат да влијаат на односот кон реформите и европскиот пат на БиХ.