Бродовите и возовите во Грција утре нема да сообраќаат поради 24-часовниот штрајк организиран од двата синдикати – Заедничка конфедерација на трудот (ГСЕЕ) и Федерацијата на државните службеници (АДЕДИ) по повод 1. мај – Меѓународниот ден на трудот и работничката солидарност.
Во штрајкот ќе учествуваат и пристанишните работници, вработените во градскиот транспорт, во локалната самоуправа, во банките, во аптеките и во болниците. Тролебусите, автобусите и метрото редуцирано ќе сообраќаат, само дежурните аптеки ќе бидат отворени, а болниците ќе ги примаат само итните случаи.
Протестите се насочени кон рестриктивната политика и рекордно високата стапка на невработеност од над 27 проценти.