Официјална Атина најави дека е подготвена да спроведе истрага во врска со смртните закани кои директорката на ММФ, Кристин Лагард ги добила откако го критикуваше однесувањето на Грците по прашањето за даноците во екот на кризата во Грција.
Грчкиот министер за правда Хараламбос Атанасиу напишал писмо до Лагард, за да ја извести дека може да биде спроведена истрага, ако таа на правосудните органи им ги достави „имињата, датумите, елементите“, изјавил судски извор.
Во интервју за весникот „Фајненшл тајмс“ објавено во петокот, Лагард рече дека кога во минатото зборувала за Грција и за нејзините даноци, добила смртни закани поради кои морало да се зајакнат мерките за безбедност.
Во пролетта 2012 година, во екот на меѓународните економски тензии по прашањето за Грција, Кристин Лагард за британски „Гардијан“ изјави дека Грците би требало да почнат колективно да си помагаат со тоа што ќе си ги плаќаат даноците. Таа рече дека е помалку загрижена за нивната судбина, отколку за таа на децата во Африка.