Бремени жени и нивните сопрузи синоќа протестираа во Истанбул против изјавата на турскиот адвокат Јомер Тугру Инанчер, кој изјави дека е неморално бремени жени да се појавуваат на јавни места.
Инанчер во програма на турската државна телевизија ТРТ изјави дека бременоста е спротивна на турската култура. Тој наведе дека бремените жени не треба да се шетаат по улица со големи стомаци.
– Прво тоа не е естетски, идните мајки по седмиот или осмиот месец на бременоста треба да бидат изведувани од сопрузите со автомобил, за да подишат чист воздух и тие треба да излегуваат навечер, посочи Инанчер.
Неговата изјава предизвика низа реакции на Твитер и повици за демонстрации.
Портпаролката на Партијата на зелените и левичарската иднина Надире Ѓул за ставовите на Иначер ја обвини владејачката Партија на правдата и развојот.
– Тој начин на мислење, кој си дозволува да ни диктира колку деца треба да имаме, како треба да ги раѓање, дали можеме да направиме абортус и каде можеме да одиме повторно е олицетворен од Иначер на ТРТ. Во тоа ние ја препознаваме политиката за жената на АКП. И ние сме против тоа. Бременоста не е срамна, посочи Ѓул.
Дирекцијата за религиозни прашања во Турција изјави дека исламот не бара изолација на жените и оти мајчинството е подарок. Но, во исто време ги повика бремените жени скромно да се облекуваат и да не го покажуваат стомакот или грбот.