Еврокомесарот за проширување Штефан Филе оцени дека годишниот извештај за напредокот на кандидатите и потенцијалните кандидати за членство во Европската унија, кој ќе биде претставен утре е одбележан со влезот на Хрватска во ЕУ, како и со продолжението на проширувањето на Унијата.
– Мораме со нешто да ја заслужиме таа Нобелова награда за мир. Второ проширувањето продолжува и покрај финансиската криза. Продолжува не по инерција, туку поради продлабочување на интеграцијата, истакна Филе во видео изјавата, објавена на официјалниот сајт на Унијата.
Филе додаде дека приоритет се и владеењето на правото и борбата против корупцијата, но важни се и економските прашања на државите кандидатки и потенцијалните кандидати за членство во Унијата, со цел тие целосно да бидат подготвени за придружување.
Тој истакна дека ЕК и натаму е „најдобриот пријател и приврзаник“ на државите кандидати и на потенцијалните кандидати на нивниот пат кон членство во Унијата.