Државите од регионот на Западен Балкан во изминатиов период направија решителни чекори на патот кон ЕУ, смета известувачот на Европскиот парламент за визната либерализација, словенечката европратеничка Тања Фајон.
– Минатата година имаше многу позитивни движења во земјите опфатени со процесот на проширување. Освен оние што се однесуваат на Хрватска, Црна Гора и Србија, позитивни резултаи се постигнати и во Македонија, каде дијалогот на високо ниво со властите во Скопје доведе до поостар фокус на реформите. Дијалогот меѓу Владата и опозицијата во Албанија доведе до крај на политичката блокада, а усвојување на изборните и парламентарните реформи во голема би го надградило овој напредок, наведува Фајон во својата колумна на босанскиот портал „Европски едукативен центар“.
Фајон натаму во текстот констатира дека од сите земји во регионот само во БиХ нема напредок, а земјата се уште не ни поднела апликација за членство во ЕУ, за што, според неа, одговорност сносат политичарите. Граѓаните на БиХ заслужуваат кредибилна политика, која државата ќе ја води на патот на реформите кон интеграција во ЕУ, оценува Фајон.
Според неа, доколку ги исполни условите што се поставени пред неа, БиХ би можела „до крајот на првата половина на 2013 година да поднесе кредибилна апликација за членство во ЕУ“. – За БиХ 2012 беше изгубена година и сега е време да се направи чекор напред, чекор кој БиХ неповратно ќе ја однесе на европскиот пат, смета Фајон.